Hotuna daga Lebanon sun nuna girman barna a Beirut

Sojojin Isra'ila na ci gaba da kai munanan hare-hare ta sama kan wasu wurare a Lebanon, kamar yadda aka gani a safiyar ranar 3 ga watan Oktoba a Beirut. Sojojin Isra'ila sun ce suna kai farmaki kan wuraren da mayakan Hizbullah masu samun goyon bayan Iran suka boye. Isra'ila ta tura sojojinta na kasa a kudancin Lebanon tun ranar 1 ga Oktoba.

An dauki wannan hoton ne a safiyar Alhamis, daya daga cikin gundumomin kudancin Beirut. Jiragen yakin Isra'ila sun kai hari a wasu wuraren kudancin Lebanon da kwarin Bekaa da ke da tazarar kilomita 60 daga gabashin babban birnin kasar.

Wani harin da Isra'ila ta kai wa wani gini a unguwar Bashoura da ke tsakiyar birnin Beirut. A cewar majiyoyin Isra'ila, ginin yana dauke da ofishin hukumar lafiya ta Musulunci, wanda ke da alaka da kungiyar Hizbollah. Haka zalika, ginin yana kusa da ofishin firaministan kasar da majalisar dokokin Lebanon.

Yayin da rana ta fito kan baraguzan hayaki a gundumar Moawwad ta kudancin Beirut a ranar Alhamis, mazauna yankin sun yi nazarin irin barnar da aka yi a unguwarsu.

Mutanen da suka yi asarar gidajensu sun yi nasarar samun matsuguni a shahararen gidan rawa na Skybar, an fi sanin wannan gidan da rayuwar dare a Beirut. Mutane sun kasance suna taimakon juna ta hanyar shirya agajin gaggawa da abinci da wurin kwana.

Dandalin Shahidai mai nisan kilomita daya daga tashar jiragen ruwa a tsakiyar birnin Beirut, shi ma ya zama sansani da mafaka ga iyalai. Da yawa na cikin rudani, sun rasa duk abin da ba za su iya dauka ba, kuma ba su san abin da za su yi ba.

Watakila za a dauki lokaci kafin a sake gina gidajen da aka lalata. Rikicin kawo karshe ba, amma a halin yanzu ana share baraguzan tituna ta hanyar amfani da wadannan kananan motocin shara.