ملګرو ملتونو د کډوالو جایزه یوې برازيلۍ راهبې ته ورکړه

د مهاجرو په چارو کې د ملګرو ملتونو عالي کمشنرۍ په ژنیف کې وویل چې برازيلۍ راهبې، ۷۹ کلنې روزیتا ميلیسي، د دغه سازمان د «مهاجرو نانسن جایزه» ترلاسه کړې ده. د دغه سازمان په خبره، دغه «مذهبي خور» چې حقوقپوه او ټولنیزه مرستندویه ده، د بېځایه شوو خلکو د حقونو او کرامت د خوندي ساتلو په لار کې د خپلې نژدې ۴۰ کلنې مبارزې له پاره، د دغه سازمان په تر ټولو لوړې جایزې ستایل شوې ده.

د مهاجرو په چارو کې د ملګرو ملتونو د عالي کمشرنۍ په اعلامیه کې راغلي چې «روزیتا خور» په برازيل کې زرونو خلکو ته خواړه او سرپناه چمتو او له هغوی سره ېې د کور، تعلیم او کار موندلو په برخو کې مرستې کړي دي.

زیاته شوې ده چې دغې حقوق پوه ښځې د مهاجرو د حقوقي وضعیت په بهبود کې خپل رغنده سهم ادا کړی دی. کمشنري د «روزیتا خور» له قوله وایي: «کله چې یو کار تر لاس لاندې نیسم، دنیا لاندې او باندې کوم تر څو ېې چې سرته ورسوم.»

د مهاجرو په چارو کې د ملګرو متلونو عالي کمشنري (UNHCR) له ۱۹۵۴ راهیسې هر کال افرادو ته د مهاجرو د ملاتړ او فوق العاده فعالیتونو د ستاينې په خاطر د «مهاجرو نانسن جایزه» ورکوي. دغه جایزه د دغې کمشنرۍ د لومړني کمیسار، فریتیوف نانسن، په نوم نومول شوې ده.

له «مذهبي خور» روزیتا میلیسي علاوه، څلورو نورو کسانو سیمه ایزې جایزې ترلاسه کړي دي چې په هغو کې یوه ېې داوود نوميږي چې په ۲۰۱۴م کال کې له خپل هېواد سوريې څخه ترکیې ته مهاجره شوې. دغې مېرمنې هلته خپل ښوونځی پای ته ورساوه او اوس د کمپيوټر انجنیرۍ په څانګه کې تحصيل کوي. هغې د خپل تحصیل په جریان کې د هغو مهاجرو د درملنې له پاره یو آنلاین پلاتفورم جوړ کړ چې رواني زیانونه ېې ليدلي دي. په حاضر وخت کې تر سلو ډېر ارواه پوهان په دغه پلاتفورم کې په مختلفو ژبو خدمات وړاندې کوي.

mks,nz/si,af/(dpa)

 له آرشیف څخه: